真系短打，谂唔到费达拿告别战比赛时间都比预期为长，捱眼瞓都抵，而有睇波嘅肯定都会同天王一样同喜同悲，心情难以平伏，几眼瞓，都想同大家分享呢种感觉。

呢场由费达拿（roger federer）夥拍拿度嘅利华盃双打，既然系天王挂拍战，当然系有今生冇来世，场波比预期打得耐，赢输，讲真唔系最重要，比赛嘅每个片段都令人难忘，喜欢佢嘅，睇佢打每一球都系享受，亦感到唔舍得……

最意外当然系佢一球抽击，竟然打中网角个洞，如无意外系佢网球生涯第一次，亦系最後一次咁样能人所不能。真系叫佢打多千万次都未必copy到。赛後现场播放为佢特备嘅片段，本来已经喊紧嘅天王一路睇一路喊得更厉害，其他人亦同哭，现场系出自离愁别绪嘅一片愁云惨雾，好似亲人离别咁。

比赛都有笑位，好似见天王同拿度行埋密密斟战术，分开转个头又行番转头，好似未倾掂或者唔明白，令现场人士失笑。大家笑，亦因为见到天王好几次击落点出色，展现满意嘅笑容。

好值得回味嘅比赛，最唔舍得，系唔知将来仲有冇球手，可以似费天王咁掀动球迷情绪。