世界盃大家除咗睇波之外，周边产品亦商机处处，各队波衫当然成为各支球队支持者必买之物。究竟今届卡塔尔世盃有乜靓波衫？不如先从亚洲区日本同韩国两支极受香港人注意嘅波衫了解吓。

日本国家队波衫一向受到香港球迷欢迎，讲到底因为设计特别认真，多细节位，主色调蓝色着出街唔太抢，平实得嚟带特别，系现今倒模式设计下，已经异常突出。2022年日本队主场波衫当然冇令球迷失望，蓝色主调配上以白色线条嘅「摺纸」概念，净系用漫画主角「试着」已经吸引球迷，到实物一出更加引起粉丝收藏欲望。

其实加入白色条纹摺纸概念，其中一个元素系2002世盃决赛颁奖时刻，整个横滨世盃竞技场空降270万只纸鹤祝贺巴西夺冠，喻意胜利祈愿放喺今届日本队身上。另一元素系卡塔尔呢个国家，对日本足球发展有深刻经历，93年多哈悲剧，然後2011年赢亚洲盃顶登，今次再重临，摺纸动作有往上摺、下摺，亦喻意日本走过高山低谷。

至於韩国今届嘅作客波衫一定抢眼过主场红色战衣，黑色主底，再配上韩国传统三太极扇颜色红色、黄色及蓝色，而呢三只色喺三太极扇上代表天、地、人，所以波衫充满韩国传统元素。赞助商用上泼墨式方法将颜色加喺波衫上，使波衫有种星空感觉﹐韩国国家队上月友赛时着住比赛，已经吸引唔少眼球注视，睇嚟喺香港嘅销路同日本主场波衫有得斗。